Una sècta tatara, d’inspiracion musulmana, aguèt pendent mai de dètz ans un vintenat de mainats jos tèrra dins un abitatge a Kazan, la capitala de la Republica de Tatarstan, dins la Federacion de Russia. Segon de mèdias russes, qualques unes avián pas jamai vist la lutz del solelh e vivián sens accès a l’educacion ni a la santat. Èran preses en carga per una comunautat que se definissiá coma “un Estat amb las siás pròprias nòrmas”.

Lo cap de la polícia de Kazan, Ranis Bakhitov, diguèt al primièr canal de la television estatala russa qu’un vintenat de menors, d’entre 1 e 17 ans, foguèron localizats dins una seguida de tutas de sièis mètres cairats, bastidas en forma de laberint amb uèch nivèls sosterranhs jos un ostal dels entorns de la vila. Dejós l’ostal, i demoravan qualques 70 personas dins 30 cambras dempuèi almens dètz ans.
 
Los menors d’edat son estats portats a d’espitals de la region amb los lors parents, que probablament ne perdràn la garda quand o aurà sollicitat la justícia russa. Après un primièr examen medical, los enfants se pòrtan plan.
 
Quatre dels membres de la sècta son acusats de maltractament infantil e lo cap de l’organizacion, de mai, de recrutar d’enfants e d’adultes, e de los obligar de li autrejar tot lo lor argent. Lo cap “enebissiá als membres de la sècta d’anar als centres sanitaris e de recebre quina ajuda medicala que siá. Enebissiá als enfants en edat escolara d’anar a l’escòla, e alavetz que violava los dreches constitucionals dels ciutadans a l’educacion e la santat”, çò diguèt lo ministèri public de Kazan.